Búið að vera hálfgert bras á mér síðan ég fór á fætur. Þessar smiðsnefnur sem settu upp skrifstofurnar á 5. hæð akademíunnar létu ekki sjá sig eins og þeir lofuðu og ég er búinn að vera að reyna að ná í þá í allan dag til að lesa yfir hausamótunum á þeim. Ekkert gekk. Ég gerði skrifstofurnar á 3. hæð sem ég hef verið að vinna í klárar undir málningu og vatt mér svo í að skipta um skrá á annarri skrifstofu. Það kostaði ótal ferðir út í BYKO, því ekkert af því sem ég keypti virtist ætla að passa. Það er stundum þannig.
Jórunn hringdi og bað mig um aðstoð við nýja eldavél sem hún var að kaupa - ég rölti þangað auðvitað, enda besti nágranninn minn - svo á hún líka svo assgoti góðan jólasnaps sem er engu líkur og smákökur sem eru barasta bestu smákökur í öllum heiminum og gegna nafninu Sörur. Ótrúlega skynsamar smákökur. Ég get étið þær endalaust . Við redduðum þessari eldavél auðvitað í sameiningu. Kláraði síðan þetta skráarvandamál og fór svo heim.
Ó, já - svo hringdi kona af Suðurlandi og pantaði galdrakönnur. Það er nú gott. Ég er nefnilega svolítið stressaður yfir sölunni í Galdrabúðinni fyrir jólin.
ble-si.