Þá eru stóru mál þessarar viku að verða nánast frágengin svo Galdrasýningin getur farið að anda léttara í bili. Málskotið til stjórnar Byggðastofnunar alveg að verða klárt og umsóknin til Opinnar menningar er svo að segja alveg klár. Bara eftir að kvitta nafnið mitt undir og póstleggja það.
Gaman er af því strípalingur.
Nú er föstudagslíki og maður ætti eiginlega að vera að fara að gera eitthvað skemmtilegt, sem ég er ekki að fara að gera. Á morgun er 1. maí og þá ætti ég að fara í kröfugöngu, sem ég er ekki heldur að fara að gera.
Ble-si

Úti er snjór og slydda
en það er sko alltílæ.
Því ég er algjör lydda
og það er að koma maí.

Ble-si

Morrinn sjálfur!
Ég er búinn að lofa einhverju andskotans galdrauppistandi frá Helvíti á einhverri ferðamálakynnningu í Smáralind um helgina, laugardag og sunnudag. Ég sem ætlaði aldrei í þessa Smáralind.
Ég veit ekki á hvurjum fjáranum ég ætti að taka upp á. Kannski gerir það bara ekkert til því líklega finn ég þessa asnalegu Smáralind hvort eð er aldrei.
Þetta er agalegt.
Ég segi meira frá síðar ef ég kem hausnum í gang, sem er erfitt, því ég hugsa eingöngu um fjárhagsáhyggjur galdranna og reyni að skrifa göróttar setningar sem leiða peningamenn á réttar brautir.
Ég ætla allavega að vera fyndinn.
Ble-si

Ég er handviss um að tíminn er hættur að líða og þar með að klukkan er stop. Gula fíflið skín ennþá innum sama gluggann hjá mér eins og hún gerði eldsnemma í morgun - svo ég sé ekkert - og geri þar af leiðandi ekki nokkurn skapaðan hlut af viti.
Ble-si

Í dag er svo mikil sól og blíða að ég hugsa að ég geti ekki gert neitt af viti í dag. Það fer öll orkan í að píra augun gegn sólinni sem skín í gegnum gluggann og reyna að sjá hvað ég ætti að vera að gera.
Það líður vonandi hjá.
Ble-si

Ég fékk svo fjári skemmtilegan tölvupóst frá einni Hólmavíkurmærinni og má til með að setja niðurlagið úr því hér til geymslu og skemmtunar.
...Annars, til gamans, hef ég verið að leika í þýskri kvikmynd öðru hvoru síðustu mánuði, hún er að hluta tekin á Keflavíkurflugvelli. Í einu hléinu spyr ein þýska stelpan mig hvaðan ég sé og ég segist vera frá Hólmavík og að það sé á Ströndum á norðvesturlandi. Hún spyr þá hvort ég sé virkilega frá Hólmavík og ég segi já. Þá kallar hún á allt liðið og segir: She´s from the place of magic and witchcraft. Þar með varð ég allt í einu miðpunktur allrar athyglinnar (ég er nú bara í aukahlutverki í þessari mynd) og allir fara að spyrja mig út í galdrana, hvað ég kunni og svo framvegis. Vefurinn er greinlega alþjóðlegur og ég held að þjóðverjarnir séu nokkuð vel með á nótunum.
Kveðja,
...
Ble-si

Ja, margt er skrítið í kýrhausnum. Það er líklega ekkert til, hvorki á himnaríki né jörðu, sem Ísfirðingar nenna ekki að rausa yfir og rífast um.
Ble-si

Jæja, kom að norðan fyrir klukkustund. Fínn túr og aðalfundur Strandagaldurs 2003 yfirstaðinn. Góður fundur og margar ákvarðanir um ekkert teknar. Galdrasýningarhúsið á Klúku (Kotbýli kuklarans) lítur vel úr. Það verður fjör ef það verður einhverntíman hægt að klára það.
Það snjóaði fyrir norðan og mér finnst lóur heimskar. Ef ég væri lóa þá héldi ég mig á Skotlandi í stað þess að vera að fljúga hingað norður og niður til að fá mér einn drátt til að geta flogið aftur til baka um haustið þegar ég væri búinn að jafna mig á honum.
Veit ekki annars - kannski myndi maður fljúga á heimsenda ef maður ætti von á einum góðum. Skal ekki segja. En allavega er ég feginn að vera ekki farfugl. Skárra að vera furðufugl.
Ég ætla að stofna Galdraskóla á Ströndum á næsta ári. Það verður fjör. Ég útlista starfsemina seinna.
Atli minn læsti sig í lyftunni hérna í húsinu í gær. Ég er alveg hissa á því vegna þess að drengurinn þorir aldrei lyftu. Líklega fer hann aldrei í lyftu aftur. Hann hringdi í mig úr lyftunni alveg í losti. Að endingu þá braust hann út úr lyftunni áður en hann kafnaði. Ég er feginn að hann kafnaði ekki. Það hefði nú ekki verið gaman að eiga kafnaðan son. Ó,nei.
Jæja- gúten abent, æne slabent.
Eitt enn - það er umfjöllun á mbl.is um sýningu Leikfélags Hólmavíkur á Sex í sveit í Trékyllisvík í gærkvöldi.
Þetta er snillingar.
Ble-si

Ég er að græja mig af stað norður á Strandir. Jórunn var svo væn að lána mér bílinn sinn svo mér er ekki til setunnar boðið. Það er gott að eiga svona góða að. Takk fyrir kærlega Jórunn.
Ég vona bara að það eigi ekki eftir að færa bílinn til skoðunar því mér skilst að héraðslögregluþjónarnir fyrir norðan sé í því að bögga vegfarendur eins og þeir mögulega geta um þessar mundir.
Svo var ég að muna að ég verð að fara að sækja mér nýtt ökuskírteini. Það er nefnilega búið að vera týnt núna í fjögur ár eða lengur. Þetta gengur bara ekki lengur.
Allavega - ég er farinn að setja eitt og annað oní tösku og ætla svo að fara að rúlla mér af stað í rólegheitum. Ég vona að einhverjir puttalingar verði á vegi mínum. Mér finnst gaman að taka þá upp í. Nema þá sem lykta mjög illa. Ég hef einu sinni lent í því.
Lúlli er farinn til sinna heima. Ég sakna hans svoldið.
Ble-si

Allir að muna að það er ungi klukkan fimm. Eins og alltaf á föstudögum.
Ungi klukkan 17:00-19:00 á Litla ljóta.
Ble-si

Ég stefni að því að fara norður á Strandir um helgina með einhverjum ráðum. Er bara ekki búinn að finna far ennþá. Bíllinn minn er náttúrulega bilaður ennþá og það lítur ekki út fyrir að hann komist í lag á næstunni. Ekki veit ég hvenær, eða hvernig það mál fer. En ég er samt búinn að fá lánaðan bíl ef út í það færi en þá verð ég líka að koma til baka á sunnudagskvöldið. Ætli það verði ekki bara þannig. Þó einhver mótmæli því hástöfum.
Mér sko alveg sama. Helduru að mér sé ekki sama? Mér er sko alveg sama.
Lúlli er sofandi ennþá.
Ble-si

Þetta er fyrsti sumardagurinn fyrsti með sumarblíðu en ekki rigningu - ef ég man rétt. Mikið væri nú gaman að eiga bát og geta farið að sigla á svona dögum. Helst bát með stýri og sæti. Það er bátasýning í bátabúð hér rétt hjá. Kannski ég skreppi þangað í göngutúr með Lúlla og kaupi einn útlitsgallaðan. Með stýri og sæti.
Ble-si

Lúlli er í heimsókn hjá mér. Hann kom í gær og var svolítið ráðvilltur til að byrja með. En það tók ekki langan tíma þar til hann var búinn að kanna alla króka og kima og sætta sig við stöðuna. Honum finnst skemmtilegast að sitja útí gluggunum og horfa á starrana. Hann langar svoldið að leika við þá.
Lúlli er ekki alveg búinn að átta sig á því ennþá hver er húsbóndinn á heimilinu. Mér fannst það svolítið óþægilegt þegar hann náði af mér sófanum í gærkvöldi, svo ég varð að liggja allur á ská meðan ég horfði á sjónvarpið - því hann hreyfði sig hvergi. Svo fer það svolítið í taugarnar á honum þegar ég sit við tölvuna - þá stekkur hann upp á borðið við hliðina á mér og hendir penna niðrá gólf. Ég hef ekki haft undan að teygja mig eftir pennanum.
Ég er svoldið mikið að hlaupa á milli herbergja og athuga hvort allir gluggar séu ekki örugglega lokaðir.
Já, það er svoldið mikil vinna að vera með Lúlla í heimsókn. En hann er þægur. Ég hef bara áhyggjur af því hvað hann borðar lítið. Hann vill ekki einu sinni lifrarkæfu. Það finnst mér vera skrítin kisa.
Svo óska ég öllum gleðilegs sumars.
Ble-si

Áka frænda tókst að narra mig á Ungann aftur. Af því að það er föstudagslíki. Best að fara þá.
Þið vitið hvar mig er að finna.
Ble-si

Ég kenndi Áka að kvaka. Hann fór kvakandi heim. Aumingja konan hans.
Ble-si

Áki vill hitta mig á Unganum. Þá geri ég það. Alltaf gott að hafa einn andarunga í spilinu. Svona lítið ættarmót.
Ble-si

Munið að taka frá daginn.

Ég lofa óborganlegri skemmtun.
Ble-si

Páskaferðalagið mitt var ekki síðra en flestra annarra. Fór alla leið upp að Hafravatni í þessu einmuna hjólaveðri í gær. Settist þar niður milli þúfna og lét fara vel um mig meðan ég gæddi mér á nestinu. Fleytti svo kellingum um hríð og rölti um vatnsbakkann. Sumarið er að fæðast á ný. Ég fann ilminn af því.
Ble-si

Í dag ætla ég að hjóla eitthvað og taka með mér myndavélina. Þá get ég sagst hafa ferðast eitthvað um páskana.
Ble-si

Hörmung er að sjá þetta. Ég hef ekki skrifað neitt hingað inn af viti í langan tíma.
Ble-si

Það er komið nýtt útlit í tilefni komu páskana um þessi jól.
Ég fékk ekkert páskaegg. En er búinn að drekka þrjú glös af kókómalti í staðinn. En þau verða víst ekki fleiri því mjólkin er búin og allar mjólkurbúðir eru lokaðar.
Þetta er málshátturinn sem ég fann utan á mjólkurfernunni: Það er ekki á allt kosið þegar eggjarauðan fylgir ekki egginu, sagði kellingin og renndi sér á pilsfaldinum niður brekkuna. Hvað skyldi þetta standa fyrir?
Gleðilega páska.
Ble-si

Ég segi nú bara eins og kellingin sagði við kallinn: Ekki er stropað kálið þó í eggjabikarinn sé komið.
En ég geri eins og ég get.
Gleðilega páska úr því sem komið er.
Ble-si

Það er föstudagur í dag svo það ætti að vera Andarungi. En það er enginn Andarungi fyrst það er föstudagurinn langi. Sem segir mér að fyrst áætlunin fellur niður á Andarungann þá hlýtur Andarunginn að koma til mín. Hmm - ég ætla að athuga hvort það sé ekki ungi inní ísskáp.
(Gáð)
Jú,jú - bíðið við! Sat ekki bara ískaldur skjálfandi andarungi í einni hillunni í ísskápnum mínum og bað mig um að skvetta mestum hrollinum úr sér yfir í mig. Þar sem ég er nú afspyrnu mikill fuglavinur þá náttúrulega geri ég það. Síðan drekk ég alla bræður hans og systur.
Ble-si

Ég veit ekki hvað ég ætti að gera í dag. Eitthvað verður maður að gera. Kannski maður klári að smíða þennan vegg þarna niðri sem ég byrjaði einu sinni á. Það væri fínt að fara út að hjóla ef það væri ekki þetta rok. Svo er allt lokað allstaðar náttúrulega. Það er ágætt. Fínt að hafa einn dag á ári þar sem allt er lok lok og læs.
Ég gæti nú lagað til inni hjá mér. Tekið skrifstofuna í gegn, raðað pappírum og ryksugað og skúrað. Já, það er líklega ágæt hugmynd að byrja á því og gera svo eitthvað annað á eftir.
Svo get ég náttúrulega líka gert ekki neitt. Það er auðvitað inní myndinni líka.
Það er enginn búinn að bjóða mér í partý í kvöld.
Það finnst mér afar einkennilegt. Vægast sagt.
Ég vildi ég væri á ferðalagi í útlöndum yfir þessa páska frekar en að hanga hér. Það er 25 stiga hiti í Evrópu.
Ble-si

Atli minn brunaði norðan af Ströndum í bæinn í gær til að fara með mér í ferminguna, þannig að ég þurfti ekki að hjóla. Þessi fermingarveisla var fín, fullt af fólki og fermingarbarnið glæsilegt og glatt. Það er nú fyrir mestu. Húsið hjá þeim er orðið glæsilegt eftir síðustu breytingar - komin þessi æðislega sólstofa út úr eldhúsinu sem er einnig búið að stækka og breyta. Þarna vorum við öll systkynin nema Erna og Gísli, sem eru aðal, en það er orðið ansi langt síðan við höfum verið svona mörg saman undir sama þaki.
Það kom ekkert sérstakt uppá í gær. Dagurinn leið eins og hver annar skírdagur án teljandi viðburða. Ég var þó hissa á því hvað þeir eru langt komnir með að breikka Reykjanesbrautina. Þetta tekur ekki nærri því jafnlangan tíma og ég hafði ímyndað mér. En það er samt langt í land.
Sat yfir sjónvarpinu í gær - eða lá - eftir atvikum og horfði á "Im just a girl, standing in front of a boy and asking him to love her".
Fór snemma í rúmið og varð hugsað til Leikfélags Hólmavíkur þar sem það var að klára frumsýninguna á Sex í sveit. Eflaust verið fjör hjá þeim.
Ble-si

Veðrið er svo yndislegt á þessum Skírdegi. Glampandi sól og svo hjálpar starrinn sem situr utan við gluggann hjá mér upp á stemninguna. Hann er búinn að sitja þarna og raula lítil lög í takti við veðrið. Skemmtilegur fugl. Mér er sagt að hann grípi hljóð úr umhverfinu og hermi eftir þeim.
Það er ferming í fjölskyldunni í dag. Guðrún Harpa hans Atla Más bróður er semsagt að fara að staðfesta skírnina. Það er rétt að gera tilraun til að komast þangað suðureftir. Kannski ég hjóli bara. Því bíllinn er ennþá bilaður. Hvað ætli maður sé lengi að hjóla í Reykjanesbæ?
Ásdís hélt upp á afmælið sitt fyrir norðan í gær - það hefur eflaust verið mikið fjör ef ég þekki hana rétt. Líf og fjör. Svo er Leikfélag Hólmavíkur að frumsýna nýtt leikrit í kvöld. Það væri gaman að sjá það. En það kemur til Reykjavíkur með leikritið og sýnir í Tjarnarbíói gamla þann 17. maí n.k. Ég hvet náttúrulega alla til að mæta þegar þar að kemur. Leikfélag Hólmavíkur klikkar aldrei.
Borgin sefur ennþá og enginn er á vappi á Hringbrautinni. Jafnvel þó klukkan sé 8:45. Nema ég og fyrrnefndur starri sem er ennþá að æfa og flytja ljúflingstóna. Jæja - nú fæ ég meira kaffi - fer svo í sturtu og raka mig.
Ble-si

Guðmundur Árni og Þorgerður Katrín voru í pólitískum umræðum í Sjónvarpinu. Þau voru bæði flokkunum sínum til skammar. Híhíhí - mér er sko sama - því ég er svo glaður og ánægður með allt.
Ble-si

Ha ha ha hæ. Ég fór oní bæ seinnipartinn og losaði mig við vonda skapið og fúllyndið. Keypti mér fullt af nýjum fötum og hagaði mér eins og eyðslusöm eiginkona. Eyddi og eyddi - og var snöggur að því.
Nú er ég allur bjartari yfirlitum og viðbúinn að taka við vorinu. Hress og kátur.
Ég er ferlega fínn og feitur.
Ble-si

Ég vildi það væri ekki öllum gefið að skíta. Því þá væri ég bestur í því.
Ble-si

Heitasta helvíti - fjandinn hirði búrókrata ríkisstofnana. Þeir eru farnir að taka of mikil ráð af kjörnum fulltrúum. Ég hef breytt um skoðun og stefnu af afskiptum stjórnmálamanna. Ætli ég endi ekki sem brjálaður framsóknarmaur.
Ble-si

Þetta er einn versti dagur sem ég hef upplifað.
Helvítis helvíti - það er ekkert að ganga upp hvergi - vonandi kominn nýr útgefandi. Hinn er útí hafsauga - því hann hefur engan skilning á því að Angurgapi er merkilegra rit en ljósritið hans Matthíasar Viðars sem þeir sitja uppi með í þúsundatali. Ömurlegt að vera að tala um þessi tvö rit í einni og sömu setningunni. Ég ætla að brenna mitt eintak.
Hefði aldrei átt að hringja í stjórnarformann Byggðastofnunar. Og þó? Ekki viss.
Ble-si

Ég gerði margt og mikið um helgina. Innréttaði hús frá toppi til táar - fór á skrall - missti vitið um tíma - læsti mig úti - gerði tilraun til innbrots - týndi símanum - fann hann aftur - fór að sofa - vaknaði aftur og hvíldi mig.
En nú tekur alvaran við.
Ble-si

Djöfuls hörmung.
Ble-si

Unginn byrjaði vel. Áki mætti fyrstur - svo ég, Jórunn kom seinna og svo birtust skötuhjúin Óskar og Rakel. Vel mannað. Búið klukkan 19:00 eins og til stóð.
En nú er ég að fara að smíða hjá Viðari Hreins á Ásvallagötunni.
Veðrið er æðislegt. Glampandi sól og huggulegheit.
Ble-si

Jæja - best að tygja sig á Ungann. Veðrið er yndislegt.
Ble-si

Nú læt ég það berast til allra sem ég hefi umgengist undanfarin misseri að framvegis verður farið í öl á föstudagseftirmiðdögum - á Litla andarunganum við Lækjargötu þar til annað verður ákveðið - klukkan 17:00 - 19:00 á föstudögum. Þangað eiga allir að mæta sem geta, en enginn verður þó skyldugur til þess.
Enginn verður skilinn útundan því allir geta mætt - enginn kladdi verður til að merkja við - einungis um að ræða föstudagsöl fyrir þá sem kæra sig um.
Ég endurtek það að enginn verður skilinn útundan og að öllum er í sjáfsvaldi gert að mæta. Það verður spennandi að sjá hvort einhverjir láta sjá sig. Ég veit að ég kem - og að Jórunn kemur - og að Áki kemur - og ég er viss um að Rakel mætir líka öðruhvoru - einnig að Davíð og Lína eiga eftir að reka inn nefið. Og margir fleiri því það eru allir velkomnir og enginn er skilinn útundan. Þetta er nefnilega öllum í sjálfsvald sett.
Er mögulegt að tala skýrar?
Ble-si

Nú er bara að muna eftir að hlusta á Samfélagið í nærmynd á Rás 1 á morgun fimmtudag kl. 11:03. Þar verður kosningavefurinn umtalsefnið. Einnig á svæðisútvarpi Vestfjarða í kvöld.
Ble-si

Eftir mikið puð tókst mér að hafa uppá Skjá einum aftur. Ég týndi stöðinni einhverntíman í byrjun desember þegar loftnetið mitt datt í gólfið. Þetta er verri stöð en mig minnti. En gott að hafa möguleika á að skipta yfir á hana þegar sýndar eru andskotans íþróttir frá helvíti á hinni stöðinni.
Ég er búinn að éta yfir mig af kexi í kvöld og kominn með kexeitrun í kjölfarið.
Ég er að hugsa hvort ég geti ekki tengt sjónvarpið mitt við gervihnattadiskinn sem er hérna uppá þaki. Ég er búinn að komast að því að hann er nothæfur. En ég veit ekki hvort ég þurfi að vera með einhvern sérstakan magnara eða eitthvað.
Æ, ég er syfjaður, en nenni ekki uppí rúm. Það er alltaf þannig að ef ég fer syfjaður uppí rúm fyrir miðnætti þá sofna ég í fjóra og hálfa mínútu og glaðvakna síðan. Það er óþolandi. Það er líka óþolandi að klukkan á blogginu mínu er klukkutíma á undan og að það er ekki nokkur leið að stilla hana.
Ble-si.

Ég er glaður og kátur. Kosningavefurinn er nefnilega að svínvirka. Það var umfjöllun um hann í fréttatíma RUV í gær klukkan 17:00 sem birtist síðan á Textavarpinu. RUV.IS er með tengil inn á síðuna og Textavarpið fjallar um uppátækið. Vefritið Deiglan.com fjallar líka um kosningavefinn með tengli auk þess sem ágæt grein birtist í Fréttablaðinu í morgun sem birtist einnig á Visir.is með tengil inn á síðuna. Bæjarins besta fjallar að sjálfsögðu líka um ráð galdramanna.
Útvarpsstöðin Bylgjan ætlar svo að taka við mig viðtal klukkan 16:20 í dag um hvernig best sé að nýta forn ráð í nútíma kosningabaráttu. Þá kem ég að í leiðinni hvatningu til hlustenda að leggja land undir fót um páskana og heimsækja sýninguna, en hún verður opin laugardaginn 19. apríl frá kl. 13:00 - 18:00.
Það hafa heimsótt heimasíðu Galdrasýningarinnar 120 manns það sem af er degi.
Ég má bara vera býsna kátur með mig. Er þaeki?
Ble-si

Kukl og kosningar! Það er málið.
Fréttablaðið stóð sig með sóma.
Ekki veitir af að auka kjörþokka frambjóðenda.
Svo mikið er víst.
Ble-si

Svo sagði RUV frá nýjasta kosningavefnum. Þeir hefðu mátt vanda sig örlítið betur. Þá er það bara spurningin hvort þeir standa sig á Fréttablaðinu á morgun eins og þeir lofuðu.
Ble-si

Kosningavefur Strandagaldurs er kominn í loftið. Nú er það bara spurningin hver nær bestu tökum á aðferðunum til að ná hylli okkar aumu kjósenda.
Ble-si

Síminn vakti mig í morgun klukkan hálfníu. Ég svaraði honum syfjulegri röddu. Í símanum var karlmannsrödd sem sagði:
- Heyrðu, ég ætla að skrá mig á námskeiðið hjá ykkur.
- Ha? - segi ég. Hvaða námskeið?
- Er ég að hringja í vitlaust númer? Er þetta ekki Galdrasýningin?
- Jú jú, - segi ég.
- Ármann sagði mér að þið væruð með námskeið í göldrum þarna fyrir norðan.
- Ha? - segi ég. Hvaða Ármann?
Svo útskýrði ég fyrir honum að Galdrasýning á Ströndum stæði ekki fyrir praktískum námskeiðum í göldrum. En hann var nú ekki alveg að gefa sig því hann virtist trúa þessum Ármanni betur en mér. Sagðist auk þess skilja það að við vildum ekki vera að flíka með þetta of mikið og heimtaði að fá komast inn á eitt af þessum lokuðu námskeiðum á Ströndum - sem hann vissi að væru fyrir hendi. Ég reyndi þá að róa manninn niður og gerðist ögn dularfyllri og spurði hann hvað stæði til hjá honum.
- Mér líst ekkert á þessar andskotans skoðanakannanir, sagði hann þá. Vinstri grænir eru að tapa flugi og missa allt niðrum sig og það gengur ekkert hjá þeim hér á Suðurlandi. Ég var bara að hugsa hvort ég kæmist ekki inn á eitt af þessum námskeiðum hjá ykkur til að kveða niður hina stjórnmálaflokkana einhvernvegin. Senda einhverja helvítis óáran á sjálfstæðisflokkinn og samfylkinguna.
Mér var farið að þykja þetta ansi skemmtilegt, reisti mig upp í rúminu og sagði:
- Mér litist nú best á að koma andskotans framsóknarflokknum frá helvíti fyrir kattarnef.
- Ha? hváði hann alveg steinhissa. Ég hefði nú aldrei lagt í að nefna það að fyrra bragði. Eru ekki allir á Ströndum framsóknarmenn? Ég var alveg viss um að það væri ástæðan fyrir því að framsóknarflokkurinn hefur verið við völd nánast óslitið síðustu 30 árin. Því það er göldrum líkast hvað þessi dvergflokkur hefur náð miklum sporslum til sín. Ertu viss um að það sé ekki af ykkar völdum?
Ég gat svosem ekkert verið viss um það, sagðist ekki hafa nákvæmar upplýsingar um það hvað bændur á Ströndum aðhefðust í frístundum sínum. En ég skyldi reyna að aðstoða hann lítillega. Við værum nefnilega með í fórum okkar sérstaka galdrastafi sem hann gæti nálgast á heimasíðunni seinna í dag.
- Hvað ertu að segja? Eru það einhverskonar rúnir þá?
- Já já, - svaraði ég. Þetta eru einskonar rúnir eða galdrastafir til málafylgju. Þú skalt rista þá á eikarfjöl og bera í skurðinn blóð úr vinstri stórutánni og geyma fjölina síðan á milli klæðanna. Svo þarftu að vera duglegur að sækja framboðsfundi hjá óvinunum og ef þú hefur meðhöndlað galdurinn rétt, þá munu fundarmenn snúast á þitt mál.
Ég lagði áherslu á að ef hann gerði eitthvað rangt við framkvæmdina þá væri hætta á að galdurinn snerist gegn vinstrihreyfingunni Grænt framboð. Svo það væri vissara fyrir hann að vanda sig. Ég sagði honum líka að það væri af og frá að ég færi að kenna honum að framkvæma einhverjar sendingar. Því ég hefði áhyggjur af því að kosningabaráttan ætti eftir að verða þvílíkt forarsvað að það væri alveg nóg þó það væru ekki líka framliðnir um hvippinn og hvappinn í einhverjum drulluslag. Þeir væru heldur ekki lengur með kosningarétt.
Hann var sáttur við þetta og kvaddi en sótti aftur fast á um að komast á einhver af þessum leyninámskeiðum sem Galdrasýning á Ströndum stendur fyrir.

Ég er að velta því fyrir mér hvort við getum ekki gert kosningabaráttuna að einskonar féþúfu fyrir Strandagaldur.
Ble-si

Þeir sem óska eftir að ég hafi samband við áður en ég fer í föstudagsbjórinn seinnipartinn á eftir, vinsamlega skrái sig hér að neðan. Athugið að klukkan er 13:43 en ekki 14:43 svo það er ennþá tími til að skrá sig.
Ble-si

Það er rigning. Veður vott. Pollar á strætum. Ef ég væri fiskur þá færi ég út að synda.
Auk þess er klukkan klukkutíma á undan á blogginu mínu og ég get ekki lagað það. Það fór allt í rugl þegar þeir breyttu tímanum í Evrópu um síðustu helgi.
Ble-si

Ég er að spá í að skella mér á tilboð Iceland Express sem ég fékk frá þeim í tölvupósti og fara til Köben um helgina fyrir 12.000 krónur. Frá laugardegi til mánudags. Er þetta ekki bara ágætis hugmynd? Gisti svo hjá Fanneyju, tæmi nokkrar ölkrúsir með henni og fæ mér nokkrar pulsur og flýg svo heim.
Er þetta ekki brilliant?
Ble-si

Sá sem ranglæti sáir, uppsker óhamingju.
Svona var nú málshátturinn í fyrsta páskaegginu sem ég er búinn að éta fyrir þessa páska. Það verður spennandi að sjá hvað næstu þrjátíu málshættir ráðleggja mér.
Ble-si

- Það er bara ekkert að virka bloggið. Það birtist bara ekkert af því sem ég hef skrifað undanfarna daga. Hver snilldarfærslan á fætur annarri er horfinn yfr móðuna miklu. Og aldrei þær koma til baka. Ég sé og les að fleiri hafa átt í svipuðum vandræðum. En færslurnar hafa þó birst um síðir hjá þeim. Svo ég verð bara að bíða og sjá.
Ble-si