Kokkaskóli Blesa

Ég eldaði svo framúrskarandi máltíð í kvöld sem ég ætla að deila hér á blogginu. En eins og margir vita þá er ég framúrskarandi kokkur - sem notar aldrei uppskriftir. Ég elda eftir tilfinningu. Ég er afar tilfinninganæmur þegar kemur að eldavélinni. Þetta er máltíð fyrir tvo sem hefur þann annan kost að hráefnið í hana kostar aðeins 330 krónur. Og það í Nóatúni sem er nú frekar dýr matvöruverslun. Þessi réttur heitir ekkert ennþá og ég á ekki von á að ég eigi eftir að skíra hann. En það má koma með tillögu að nafni.
OK - þá byrja ég.

Hráefni:

20 heslihnetur
1/2 appelsínugul paprika
1/2 epli
1 dós tómatpúrra (70 gr)
1 tómatur
1 laukur
Grænn chillipipar (agnarsmár)
5-6 sveppir
120 gr lamba eða nautagúllas
100 gr hrísgrjón
Ristað brauð
200-300 ml vatn
Slurk af matarolíu

Saxið grænmetið og ávöxtinn. Kveikið undir hrísgrjónum,sem eiga að sjóða í 15 mínútur. Setja olíuna á pönnu og látið hana hitna hæfilega áður en laukurinn er settur út á hana. Gefið lauknum góða stund á pönnunni en ekki brúna hann. Bætið því næst kjötinu saman við og hristið saman ásamt hnetunum. Því næst chillipiparinn sem er skorinn agnarsmátt. Á eftir fylgja sveppirnir. Nú má hrista pönnuna aftur áður en paprikunni, eplinu og tómatinum er sparkað útí. Láta allt hrærast vel saman og bæta svo tómatpúrrunni við og hræra áfram. Bæta vatninu saman við. Þá eru hrísgrjónin tilbúinn og ágætt að setja þau bara út á pönnuna, rista brauðið og hræra öllu vel saman þar til brauðið er ristað.
Og svo bara verði ykkur að góðu - fínt að fá sér glas af ísköldu vatni með.
Ódýr gómsæt og seðjandi máltíð með lágmarks uppvaski.
Ble-si

Í þessum mánuði á ég við. Ég hugsa ég minnist á handbolta í næsta mánuði.
Hvað eru annars margir dagar í janúar?
Ble-si

Nú verður ekki minnst meira á handbolta hér á þessu bloggi. Nema að það er kominn HM-leikur hjá Klöru frænku í loftið. Ég spái Króötum efsta sæti. Og ekki orð um handbolta meir.
Ble-si
Handbolti? ... Hvað er handbolti?

Líður betur núna. Við vinnum þetta 33:31 - eftir miklar sviptingar og panik í vörn Spánverja undir lokin, þar sem þeir missa tvo menn útaf.
Ble-si.

Magur og magkona. Þessi tvo orð vísa til þess að einstaklingur (kk) er magur og einstaklingur (kvk) er mögur. Þessi orðanotkun vísar til málnotkunar sem mjög er að ryðja sér til rúms í íslenskunni, sumsé að draga úr notkun bókstafa eins og kostur er. Menn sjá fyrir sér að tölvur lækki í verði vegna færri takka á lyklaborði auk þess sem notkun lófatölva verður skilvirkari og að þær verða síður ástæða til misskilnings manna á meðal. En á meðan þróuninni stendur getur komið upp misskilningur milli samtíðarfólks. Nú þegar hefur borið á misklíð innan fjölskyldna – sérstaklega á höfuðborgarsvæðinu. Heimildarmaður sem hefur með þessi mál að gera sagði að vonast væri til að á-ið væri horfið út úr íslenskunni fyrir næstu áramót. Með breytingunni styttast nokkur orð og verða því styttri. Dæmi eru um að í sumum orðum þá detti á-ið í burt. Þar má til dæmis benda á orðið sjáaldur. Dæmi: Þú er sjáaldur augna minna – setning sem styttist um einn bókstaf og verður – Þu ert sjaldur augna minna. Með þessari breytingu styttist setningin um þrjú slög á lyklaborði. Ekki þarf að ómaka sig við að slá in kommuna yfir u-ið í orðinu Þú og kommuna yfir fyrra a-ið í orðinu sjáaaldur, auk þess sem seinna a-ið hverfur alveg. Stefnt er að því að þonnið (þ)hverfi fljótlega í byrjun næsta árs og eðið (ð) um mitt næsta ár og í stað þeirra verði notaðir bókstafirnir T og D.
Meðan á þessum breytingum stendur er hætta á að rótgrónir málnotendur hafi allt á hornum sér og verði uppstökkari. Með tíð og tíma er talið að margir þeirra róist, og sætti sig við orðinn hlut. Aðrir deyja með þonn og eð á vörum. Þá má benda á einn afar jákvæðan þátt með þessari breytingu að feitar mágkonur nú til dags verða magrar og magrar mágkonur verða með fallega sléttan maga. Sama mun gilda um mága. Vonast er til þess að þessi breyting verði til þess að möguleiki á skilningi íslenskunnar verði enn ruglingslegri og tungumálið geti orðið að alvöru leynimáli og svo dularfullt í einfaldleika sínum að það verði sett á heimsminjaskrá ásamt The Grand Canyon, Þingvöllum og Kínamúrnum.
Reuter.

Ég er að reyna að hafa hugann við það sem ég er að gera - en það gengur illa. Hausinn á mér er staddur í Portúgal og meðan svo er þá geri ég ekki mikið af viti. Ég er ennþá að bíða eftir mikilvægri sendingu með póstinum svo ég geti klárað þetta verkefni sem ég hef verið mest við undanfarið og senda það frá mér. Þá byrjar magapína út af útkomunni úr því. En það er í lagi því maginn er hérna megin Atlantsála þó hausinn sé annarsstaðar. Ég svaf yfir mig í morgun - vaknaði ekki fyrr en 10:30. Það var svakalegt.
Ég þori varla að spá fyrir hver verða úrslitin í leiknum við Spanjólanna í kvöld. En verð að kasta fram einhverju - læt tilfinninguna ráða í þetta sinn.
ISL 30 : 32 SPA
Svona er að vera gunga.
Ble-si

Jæja þetta tókst. En ég klikkaði á spádómnum um eitt mark á lið. 32-28 í stað 33-29.
Ég er glaður og ánægður að það var ekki kallað á landsliðsstelpurnar. Smá frumhlaup hjá mér. Þessvegna er ég ekki þjálfari landsliðsins.
Ble-si

Agalegt.

Þetta lítur ekki vel út í hálfleik. Srákarnir eru bara ekki að gera það gott.
14:17.
Vondur sóknarleikur. Sourning um að setja ekki bara kvennalandsliðið inn á.
Ble-si

Gvuð minn almáttugur. Ég var rétt í þessu að muna það að það er HM-leikur núna á eftir. ISL-POL. Ég spái sigri eins og alltaf. Með svona fjórum mörkum. 32-28. Það er skorað svo agalega í þessari keppni.
Búinn að vera fínn dagur. Búinn að gera mikið og gott. Fór til dæmis niðrí bæ og fékk mér tvær pulsur með öllu á Bæjarins beztu. Þær klikka aldrei. Líklega bestu pulsur í heimi Svo þarf ég að fara í Ríkið á eftir útaf leiknum. Mér finnst nefnilega ómögulegt að horfa á handboltaleik án þess að hafa bjór við höndina. Annað er eins og að fara í bíó án þess að fá sér popp og kók.
Nú kemur sér vel að Arnlín á Bakka hefur bæst í hóp næturgesta hjá mér hérna á litla hótelinu mínu í vesturbænum. Hún er nefnilega á bíl. En minn er bilaður. Þannig að ég fæ bara hennar lánaðan og fylli skottið af guðaveigum.
Tralla-lí. Svo er ég líka svo ánægður með nýja fítusinn hér til hliðar. Málbelginn minn. Í honum getur maður leikið sér helling. Ég ætla að vera með allskyns spurningar og leiki í málbelgnum og svo er auðvitað öllum frjálst að leggja þar orð í belg eða belgja sig af einhverju monti. Ég þekki marga sem kunna það.
Um hvaðeina sem hverjum og einum dettur í hug. Jafnvel að mótmæla mér - stríða mér - dást af mér - leggja fram ástarjátningar til mín - senda mér hate mail - og bara allt sem nöfnum tjáir að nefna.
OK - Áfram Ísland!
Ble-si

Mig langar að benda á hann Kristinn frænda minn sem er með svona agalega skemmtilegt blogg. Hann var í Thailandi yfir jólin í skátaferð og segir þar skilmerkilega frá reisunni og mörgu öðru sem á daga hans drífur.
Vá - og ég hef ekki einu sinni séð Asíu með eigin augum.
Skemmtilegur strákur hann Kristinn frændi.
Ble-si

Frábærlega skemmtileg þessi Íslendingabók.
Ég er búinn að vera að rekja mig saman við hina og þessa sem ég þekki. Ég er til dæmis búinn að komast að því að lang-lang-lang-lang-lang amma mín í föðurætt og lang-lang-lang-lang-lang amma hans Jóns í móðurætt voru hvorki meira né minna en systur. Sko bara!
Um leið áttaði ég mig á því að Jóni ber náttúrulega skylda til að gefa frænda sínum einhverja afmælisgjöf eftir um það bil hálfan mánuð. Sem auðvitað gildir þá um allan hans systkynahóp sem er ekkert smáræði. Ha-ha-hæ hvað ég hlakka til. Ég ætla að finna fleiri skyldmenni svo ég fái fullt af pökkum.
Allir að byrja að safna!!!
Ble-si

Top 3 - Bloggarar
1. Rakel stendur sig eins og snillingur í blogginu - ég átti svosem aldrei von á öðru.
2. Óskar stendur sig ekki síður - hlakka til þegar hann verður kominn á flug. Held hann eigi ennþá mikið inni.
3. Jón kemur mér sífellt á óvart - hélt aldrei að hann myndi halda út svona lengi.
Svo ég minnist ekki á mig - sem er náttúrulega algjört verðlaunablogg - en ég gæti hlutleysis og minnist ekkert á mína total snilld.
Sérstök hvatningarverðlaun fær Jórunn - hún höktir svona einhvernveginn - ég hef ennþá trú á að það geti orðið eitthvað úr þessu hjá henni. Ég er ánægður með uppskriftina sem var tileinkuð mér - en veit ekki alveg - svoldið frúarlegt. Hún er meiri töffari en þetta.
Ble-si